MAI I TE KAIAKO MĀHARAHARA
KI TE KAIMIRIMIRI...
Tēnā koutou katoa. Ko Laura Alpe tōku ingoa, he uri ahau nō Ngāti Pākehā.
Ko te tautoko i ngā tāngata kia whai i ō rātou ake āhuatanga mauritau taku tino ngākau nui, ā, kua roa te huarahi kia tae mai au ki konei.
Āna, māua ko te māharahara ngā hoa piri pāua mai rā anō. I ahau e rangatahi ana, i pērā rawa te māharahara, i wehe mōata au i te whare wānanga, aukati ai i taku tohu ngā toi, me taku kī taurangi kore rawa au mō te hoki atu!
Heoi, i te tau 2009 i huri katoa tōku ao, ā, i kaha rongo au i te karanga o Te Reo Māori, e wero mai ana kia hoki atu au ki te whare wānanga kia patu i te ngāngara mataku, kia whai tohu anō au.
Ko taku huarahi rūmaki reo i raro i te maru o Te Ataarangi taku tino rongoā. Nāna i hiki te taumaha o taku māharahara, nāna hoki i whakapakari tōku tuakiri hei Ngāti Pākehā, hei tangata Tiriti anō hoki.
Ka tīmata tōku wairua ki te piki ake i ahau e kai ana i ngā karakia me ngā waiata o te ao Māori, hei tūhonohono i ahau ki tōku tamarikitanga. Nā Te Reo Māori me Te Ao Māori i hōmai ngā koha nui whakaharahara, ā, me whakahoki au i te koha rā kia tika. Otirā, i takoto te manuka e tōku pouako a Age Peke, nāna i wero mai ki a au,"ka aha koe Laura hei whakaora i tō tātou reo rangatira?"
Koia, ka haere tonu taku whai tohu i te whare wānanga mō ngā tau e toru, oti ai taku tohu whakaako tamariki - Huarahi Māori i te tau 2013. Heoi anō, i te kaha pēhi tonu mai taku mate māharahara. Ka mutu te 3 tau e whakaako tamariki ana, e whakapeto ngoi ana ki taku mahi, ka hōhā haere taku tinana, ā, ka māuiui haere ahau. I timata hei māharahara, ka huri hei ruha, hei māuiui ā tinana, ā hinengaro hoki. Tē taea te haere tonu hei kaiako pūmau, ahakoa taku ngākau nui ki te mahi.
.jpg)
I te tau 2018 kua wehe au i te akomanga ki te whai i tōku ake rongoā. Ahakoa i te tīmatanga i pōhēhē au he tino matapiko taku kōwhiringa, ko te mutunga kē mai o te pai. I ako mirimiri (relaxation massage) ahau i Wellpark College of Natural Therapies, i reira kite atu au i aku pukenga mirimiri. I kite au mā te tautoko i ētahi atu ki te whakatau wairua, tinana, hinengaro hoki, ka akiaki mai i ahau ki te whai oranga anō mōku.
I taua tau hoki i tae atu au ki Īnia ki te whai tohu pūāio (yoga). E 5 wiki te roa o taku noho i Dharamshala i raro i te maru o Trimurti Yoga, ka mutu ka riro i ahau taku tohu whakaako pūaiō 200 haora. Nā tēnei wānanga i kite au i te mana nui o te hinengaro hei whakaaweawe i te tinana me ngā kāre a roto.
I haere tonu taku ako i te pūāio i raro i te maru o Sannyasi Pragyadhara nō Pure Yoga NZ, rāua ko Swami Karma Karuna nō Anahata Yoga Retreat. I whāia taku tohu 150haora mō te whakaako pūāio whakatau 'restorative yoga' me te 'yoga nidra'. Tōtika taku whakaako i ēnei momo karaihe i te wā o te noho rāhui nā te mate urutā (Covid19) mā runga Zoom, hei hāpai, hei tautoko hoki i te iwi i taua wā taumaha.
I ēnei tau e 3 kua pahure, kua whakaako pūaiō au ki te hapori, arā, ki te marae, ngā hōro kura, ngā wāhi mahi, te whare aukati waipiro me te tarukino, ngā ruma noho, te pāka, mā runga ipurangi hoki.
Ināia tata nei kua whakatūria he whare pūāio (yoga studio) ki Ōrākei ki te whakaako pūāio ki te hapori.
I ēnei rā, ko te mirimiri, te pūāio me te hā ōku tino rongoā. Nā rātou taku tinana, taku wairua hoki i tiaki, i manaaki e taea ai e au te hoki atu ki taku mahi ki roto i te akomanga. I ngā tau e 3 kua pahure kua tutuki pai ai taku mahi ki ngā kura Māori, te whakahaere kamupene mirimiri, te whakaako pūāio hoki ki te hapori. Mei kore ake ēnei taonga hei hāpai i ahau!
.jpg)
E ngākau nui ana au ki ēnei momo rongoā nā ō rātou kaha ki te whakahoki i a tātou ki ō tātou āhuatanga tūturu - te mauritau, nā reira akiaki ai i te tinana ki te whakaora i a ia anō. E hiahia ana au ki te toha i ēnei taonga ki a koe hei oranga mōu.
Mauri ora!
Nā Laura